Ajmo da sudimo, Crnogorci!

Volimo da o ljudima pričamo ili najgore ili najbolje. Nema te nijanse sive koju odmah, iz svega mozga, ne prozovemo crnom ili bijelom. Valjda nam je tako lakše – da klasifikujemo stvari u dvije korpe, umjesto u deset ili stotinu. Svima je život bajka, a u svakoj pravoj bajci – dobro i zlo su jasno i nedvosmisleno podijeljeni.

Period između “Sine, premlada si da bi izlazila s momcima” i “Misliš li se ti udavat’?” ne traje više od dva dana (četiri ako za vikend Đoković igra finale). Od “Ono je ljudina, krvi bi ti ispod vrata da’!” do “Ono je govno od govna, pljunuću ga kad ga vidim” dijeli nas 10 eura i mjesec dana. Da bi te onaj koji te iza leđa zove raspalom pederčinom proglasio dobrim čovjekom i pravim drugom, potrebno je samo da umreš.

Voli Crnogorac da baš on bude taj koji će da mačem presječe moralni čvor na dvije savršene polovine. Da bi mesar koji stavlja vinobran u pljeskavice djevojku koja ga je odbila prestao da zove “raspaduljom frigidnom i uobraženom” i počeo da zove kurvetinom i sponzorušom, potrebno je samo da je jednom vidi kako se drži za ruku sa momkom čiji golf na poklopcu od gepeka ima jedno crveno slovo više od njegovog.

Upravo je linija između Crnogorčevih guzica crta koja dijeli one koji idu u raj od onih koji idu u pakao. Ko je pozvaniji da popljuje nedostatak patriotizma rukometaša koji su prešli da igraju za Katar od gazde kafane u divlje podignutom objektu u kome kasa pod dvoglavim orlom nije otkucala fiskalni račun još od referenduma? Ko bi trebalo da broji pjeva li neko dvije ili tri strofe himne, ako ne piljar koji radnicima sve preko minimalca isplaćuje na ruke? Ko će da kaže da su svi doktori korumpirana govna, ako ne korumpirani profesor ili policajac?

Nikad vas neodgovorne narkomančine koje ispod balkona puše travu ne mogu iznervirati kao kad na vas djeluje kombinacija bensedin-rakija-cigar. Divno li je djetetu koje se potuklo u školi objasniti da nasilje nije rješenje tako što ćete ga istući! Ako vam lavež komšijinog psa smeta da se sladite novim seks skandalom iz dnevnog tabloida – otrujte ga, jer ometa vaš moralni sud!

Najbolje kazne pišu nelegalno parkirani saobraćajci. A ako baš vas neko, ne daj Bože, prijavi za bilo što – reakcija se zna napamet: “To svi rade! Špijunčina jedna! Ko je on da mene prijavljuje? Što on misli da je?”